काठमाडौं – नेकपा माओवादी केन्द्रले आफ्ना नेताहरूका छोराछोरीलाई अब सार्वजनिक विद्यालय वा क्याम्पसमै अध्ययन गर्नुपर्ने, र विदेश पठाउन नपाउने नीतिगत निर्णयको तयारी गरिरहेको छ। पार्टी अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले शैक्षिक सुधार र समानताको सन्देश दिन यस्तो निर्णय गर्न लागिएको बताएका छन्।

अखिल क्रान्तिकारीले काठमाडौंमा आयोजना गरेको शैक्षिक संवाद कार्यक्रममा बोल्दै प्रचण्डले सार्वजनिक शिक्षा प्रणालीमा जनताको विश्वास बढाउन नेता–कार्यकर्ताहरूबाटै नमूना अभ्यास सुरु गर्नुपर्ने धारणा राखे।

प्रचण्डले आफ्नै उदाहरण दिँदै भने,”म पार्टीको सबैभन्दा ठूलो अध्यक्ष हुँ। मेरा छोराछोरी विदेश पढ्न गएका छैनन्।”उनका अनुसार, पार्टी केन्द्रमा छलफल भइरहेको छ कि सबै नेताहरूले आफ्ना छोराछोरीलाई सार्वजनिक स्कुल वा त्यस्ता क्याम्पसमा पढाउने निर्णय गर्ने।

“विदेश नपठाउने नीति पनि लागू गर्ने तयारी भइरहेको छ,” उनले थपे।

प्रचण्डले जानकारी गराए अनुसार, माओवादी केन्द्रले स्थानीय तहका जनप्रतिनिधिहरूका लागि यस किसिमको नीति लागू गरिसकेको छ।स्थानीय सरकार प्रमुखहरूको छोराछोरीलाई सार्वजनिक विद्यालयमा पढाउने अनिवार्य निर्णय कार्यान्वयनमा रहेको पनि उनले स्पष्ट पारे।

अब सोही नीतिलाई पार्टीका केन्द्रीय तहसम्म विस्तार गर्ने तयारी भएको छ।प्रचण्डले हालको शिक्षा प्रणालीले वर्गीय विभाजनलाई अझ गहिरो बनाएको आरोप पनि लगाए।

“गरीबका छोराछोरी सरकारी स्कुल जान्छन्, धनीका विदेश। यस्तो दोहोरो मापदण्ड हटाउन नेताहरूबाटै उदाहरणीय अभ्यास आवश्यक छ,” – प्रचण्ड।

उनले सार्वजनिक विद्यालय सुधार गर्न राजनीतिक संकल्प र नीतिगत प्रतिबद्धता आवश्यक भएको भन्दै सैद्धान्तिक निर्णय मात्र होइन, व्यवहारिक कार्यान्वयनमै जोड दिनुपर्ने बताए।